Corresponsabilidade no fogar

 O alumnado de 5º recibiu unha charla e tamén fixo un obradoiro sobre a corresponsabilidade no fogar.

Traballaron a importancia de compartir as tarefas domésticas e practicaron algunha delas.

Gustoulles moito.

Calculando perímetros en 5º

 O alumnado de 5º está a traballar os perímetros en matemáticas, e que mellor xeito de aprender que empregar o patio para facer cálculos.

“As familias contan” Ádega visita a nosa aula.

Hoxe tivemos unha visita moi especial na nosa aula de 6º de Primaria. Ádega, nai dun alumno de clase, participou no programa “As familias contan” e veu compartir con nós varios contos cheos de imaxinación, emoción e aprendizaxes.

Durante a sesión, escoitamos historias moi entretidas que nos fixeron rir e pensar. Ádega conseguiu crear un ambiente moi próximo e divertido, no que todos estivemos atentos ás aventuras e personaxes dos contos.

Ademais de fomentar o gusto pola lectura, esta actividade axúdanos a fortalecer a relación entre a escola e as familias, facendo que o alumnado viva experiencias diferentes e enriquecedoras dentro da aula.

Queremos agradecerlle a Ádega a súa participación, o seu tempo e a ilusión coa que preparou esta visita. Encantounos compartir esta experiencia e esperamos seguir gozando de novas sesións de “As familias contan”.

Moitas grazas, Ádega!

O mercado de proximidade e o consumo responsable

O alumnado de 5º de Primaria está a traballar en Proxecto Competencial arredor do mercado de proximidade e do consumo responsable. Ao longo destas sesións, os nenos e nenas investigan a procedencia dos alimentos que consumimos e reflexionan sobre a importancia de mercar produtos da nosa contorna para reducir a pegada ecolóxica, diminuír o transporte de mercancías e favorecer un consumo máis sostible. O alumnado tamén está comparando o mercado de proximidade co supermercado, analizando as vantaxes ambientais, económicas e sociais do comercio local e elaborando materiais divulgativos, entre eles un tríptico informativo realizado polo propio alumnado. Con esta proposta promóvese a educación ambiental, o consumo consciente e o coidado da contorna a través de situacións próximas e reais para o alumnado.

Desafío CanSat en 5º de primaria

Este curso académico, o alumnado de 5º participou no desafío CanSat. É unha iniciativa da Axencia Espacial Europea (ESA) que reta o alumnado de toda Europa a construír e lanzar un mini satélite do tamaño dunha lata de refresco. 

Un CanSat é unha simulación dun satélite real, integrado dentro do volume e a forma dunha lata de refresco. O desafío para o alumnado é adaptar todos os subsistemas principais que se atopan nun satélite (xerador de enerxía, sensores e sistema de comunicación) dentro deste espazo tan reducido. Ademais, cómpre sempre deseñar un sistema de descenso en forma de paracaídas.

Na fase rexional en Galicia, o CanSat elévase dentro dun dron, dentro dun habitáculo específico xunto aos CanSats doutros equipos, sendo liberado en altitude para comezar a misión primaria. Na rápida caída realízase un experimento científico, analizando posteriormente os datos de presión e temperatura e humidade recompilados.

Aquí vos deixamos un video resumo de todo o traballo realizado.

Parabéns polo excelente traballo!

Xornada de convivencia no IES Paralaia

O pasado día 23 de abril, coincidindo co día do libro, realizamos unha saída moi especial coa nosa clase de 6º de Primaria ao IES de Paralaia. Foi unha xornada de convivencia na que puidemos coñecer de preto como é a vida no instituto, algo que nos fai moita ilusión porque o vindeiro curso daremos ese gran paso.

Nada máis chegar, recibíronnos con moita amabilidade e explicáronnos como ía ser a xornada. Despois, dividímonos en grupos para participar en diferentes obradoiros (francés, cibermentores e un abradoiro con cans, da protectora do Morrazo)

Sentímonos moi ben acollidos e aprendemos moitas cousas sobre como será a nosa próxima etapa. Foi unha experiencia moi interesante que nos axudou a perder os nervios e a ilusionarnos co cambio.

Ata setembro, IES Paralaia!

Celebrando "O Día do Libro" cos compañeiros de educación Infantil de "O Con"

 O pasado 24 de abril celebramos o Día do Libro cunha fermosa actividade de convivencia entre 6º de Primaria e a escola de educación infantil "O Con".

Realizamos un apadriñamento lector, onde os maiores lles leron contos aos máis pequenos, compartindo historias e momentos moi especiais. Ademais, houbo un intercambio de cancións e e puxémoslle música coa guitarra de Txelu, a un conto que nos contou a todos e todas unha mestra de infantil  que encheu a xornada de ledicia.

Foi unha experiencia moi enriquecedora que nos permitiu gozar da lectura xuntos e aprender uns dos outros. Volveremos pronto!

23 de abril. Día do Libro

Os padriños e madriñas lectores desfrutaron dunha lectura mutua, de contos teatralizados e de momentos moi especiais na biblioteca.

Última sesión de piscina

Aquí deixamos un resumo da última sesión de piscina.

Encantounos a experiencia!

Xogade. Intercentros

 Onte, recibimos no cole ás nenas e nenos de Tirán, que viñeron compartir con nós unha xornada de convivencia na que practicamos xogos como o brilé, o hockey, atrapa a bandeira e tamén o datchball.

Moitas grazas pola vosa visita!

DÍA DA POESÍA

Onte, día 23 de marzo, celebramos no cole, xunto cos nosos afillados e afilladas lectores de 2º de primaria, o día da poesía. Intercambiamos, entre as dúas claases, flores e poemas. Os de segundo recitáronnos un poema moi bonito ao coro e nós, os de sexto, lémoslles poemas. Un poema e unha flor... hai algo mellor para comezar ou rematar o día?

Radio en directo. Radiocebola

Hoxe tocou facer un programa de radio en directo. Fixéronno Radiocebola, formado por Antía Núñez, Mara, Lucía, Irene e Noela. Todas unhas expertas! Escoitámolas? 

Disfrutádeas!

Obradoiro de costura

 Na aula de 5° seguimos avanzando no proxecto CanSat. O venres tocou aprender a coser para preparar o paracaídas do noso satélite.

Terceira sesión de piscina

 Seguimos aprendendo na piscina.

Segundo día de piscina

 Continuamos coas clases de natación.

 

E-Textís con Paola Guimeráns

 Paola Guimeráns estivo no cole unha vez máis para ensinarlle ao alumnado cal é a súa profesión e traballar con eles o tema dos circuitos eléctricos.

Deseñaron un personaxe a partir dun led e uns ollos. Coseron o led, debuxaron o personaxe e logo crearon unha historia que contaron posteriormente aos demáis compañeiros e compañeiras. 

Quedaron traballos moi fermosos.

Grazas Paola. Un pracer contar contigo!

"O mundo do Inho". Obradoiro de portugués

Hoxe, grazas ao servizo de Normalización do Concello de Moaña, tivemos no cole este obradoiro chamado "O mundo de Inho". O Mundo do INHO é un obradoiro dirixido ao terceiro ciclo de primaria para amosarlles a alumnas e alumnos diferentes chaves culturais do mundo lusófono ademais de facerlles descubrir a facilidade para leren textos en portugués e así achegarlles a lingua. Unha aproximación ao portugués, vendo a súa orixe común co galego e as semellanzas que existen entre ambos idiomas. 

Estivo xenial!

Día de Rosalía de Castro

En Quintela gústanos coidar as nosas escritoras. Por iso, celebramos o Día de Rosalía de Castro, unha das escritoras máis importantes de Galicia, cun programa de radio especial levado a cabo por Julia, Ana e Alba; cunha visita moi especial dos nenos e nenas de 6º de Infantil que recitaron un poema de Rosalía e fixérono moi ben! 

Encantounos compartir este momento tan bonito e seguir aprendendo a querer e valorar a nosa lingua.

Feliz día de Rosalía!

Piscina!

Un ano máis, o Concello de Moaña, en colaboración coa Piscina Municipal, danos a oportunidade de practicar natación durante 4 sesións no horario de Educación Física.

Encántanos!

 

Charla sobre sexualidade

 O alumnado de 6º de Primaria participou, a semana pasada, nunha charla de educación afectivo-sexual adaptada á nosa idade.

Durante a sesión falamos dos cambios físicos e emocionais que se producen na puberdade, da importancia do respecto cara ao propio corpo e ao dos demais, e de aprender que cada persoa medra ao seu ritmo. Tamén puidemos resolver dúbidas nun ambiente de confianza.

Foi unha actividade moi útil que nos axudou a comprender mellor esta etapa e a afrontala con máis seguridade.