O alumnado de 5º e 6º de primaria está totalmente implicado no traballo de investigación e comprobación dos lugares de Moaña nos que veremos a eclipse e nos que non a veremos.
Bo traballo!
04/06/26
2º Día Excursión Fin de Curso
O segundo día da nosa excursión de fin de curso foi unha aprendizaxe...
Pola mañá desprazámonos ata Padrón, unha vila con moita historia e tradición. Alí percorremos o seu casco histórico e coñecemos algúns dos seus lugares máis emblemáticos. Tamén descubrimos a lenda máis importante da localidade, relacionada co apóstolo Santiago Apóstolo. Aprendemos que, segundo a tradición, a barca que transportaba os seus restos chegou ata estas terras e que o famoso "pedrón" deu nome á vila.
Despois comemos no xardín botánico e pola tarde visitamos a Casa da Matanza, o fogar onde viviu os seus últimos anos a escritora Rosalía de Castro. Durante a visita coñecemos mellor a súa vida e a súa obra, e comprendemos a importancia que ten para a literatura e a cultura galega. Tamén realizamnos un scaperoom na súa casa!
Ao rematar as actividades en Padrón, regresamos a Galipark, onde continuamos desfrutando da convivencia. Foi unha xornada interesante, "histórica" e cultural.
Foi un día interesante!
02/06/26
1º Día Excursión Fin de Curso
O noso primeiro día está a ser toda unha aventura!
Comezamos con xogos de presentación para coñecernos mellor e continuamos coa aventura no rocódromo e nas tirolinas. Despois, tocou refrescarse e divertirse na piscina.
Agora estamos a repoñer forzas coa cea e preparándonos para a velada desta noite, que seguro estará xenial.
Deixámosvos algunhas fotos para que vexades o ben que o estamos pasando!
!
Proxecto Polos eclipsados. Traballo de campo
Xa estamos metidos de cheo no traballo de investigación. O alumnado xa está estudando en que lugares de Moaña podemos ver ou non ver a eclipse. Temos as primeiras evidencias recollidas no terreo na hora indicada, xunto coas súas correspondentes fichas de observación.
Proxecto Polos eclipsados. Montaxe da maqueta que imita unha eclipse
Moito traballamos para montar as maquetas que simulan a eclipse solar.
Imprimimos as pezas na impresora 3D, pintamos con rotulador o Sol e a Terra e, montamos o circuito eléctrico para acender un led amarillo dentro do sol.
Quedaron moi chulas!
Obradoiro de Placa Micro:bit
As nenas e nenos de 5° e 6° primaria aprendemos unha morea de cousas coa placa Micro:Bit (poñer números, caras, medir luz, temperatura, conectar leds…).
Grazas unha vez máis Paola por ensinarnos tanto e tan ben!
28/05/26
Proxecto Polos eclipsados. Cuestionario e ficha de observación directa
Canto aprendemos na charla que nos deu Kike. Así o demostra o cuestionario que cubrimos ao rematar a charla no que quedou moi clariño que sabemos moito sobre o tema.
O seguinte paso que imos dar é investigar sobre os lugares de Moaña que son idóneos para ver o eclipse e aqueles non que non o son porque hai obxectos que o impiden.
Dividiremos as distintas zonas entre o alumnado e eles terán que ir na hora indicada e comprobar se ven o sol ou non o ven e cubrir unha ficha de observación.
27/05/26
Proxecto Polos eclipsados. Charla sobre o eclipse solar
O alumnado de 5º e 6º recibiu unha charla impartida por Kike sobre o eclipse solar que poderemos ver o día 12 de agosto, enmarcada dentro do programa "Polos eclipsados".
As nenas e nenos teñen como traballo dentro deste proxecto recibir unha charla, cubrir un cuestionario sobre a mesma, montar unha maqueta que simule unha eclipse solar e preparar un tríptico para presentar no Concello de Moaña no que indicarán, entre outras cousas, os lugares idóneos para ver a eclipse. Para iso, farán un traballo de investigación que consistirá en visitar eses lugares na hora da eclipse e observar si se ve o sol, se non se ve, se hai sitio para moitas persoas, o acceso.... Todo esa información recolleranna nunha ficha.
15/05/26
Corresponsabilidade no fogar
O alumnado de 5º recibiu unha charla e tamén fixo un obradoiro sobre a corresponsabilidade no fogar.
Traballaron a importancia de compartir as tarefas domésticas e practicaron algunha delas.
Gustoulles moito.
Calculando perímetros en 5º
O alumnado de 5º está a traballar os perímetros en matemáticas, e que mellor xeito de aprender que empregar o patio para facer cálculos.
14/05/26
“As familias contan” Ádega visita a nosa aula.
Hoxe tivemos unha visita moi especial na nosa aula de 6º de Primaria. Ádega, nai dun alumno de clase, participou no programa “As familias contan” e veu compartir con nós varios contos cheos de imaxinación, emoción e aprendizaxes.
Durante a sesión, escoitamos historias moi entretidas que nos fixeron rir e pensar. Ádega conseguiu crear un ambiente moi próximo e divertido, no que todos estivemos atentos ás aventuras e personaxes dos contos.
Ademais de fomentar o gusto pola lectura, esta actividade axúdanos a fortalecer a relación entre a escola e as familias, facendo que o alumnado viva experiencias diferentes e enriquecedoras dentro da aula.
Queremos agradecerlle a Ádega a súa participación, o seu tempo e a ilusión coa que preparou esta visita. Encantounos compartir esta experiencia e esperamos seguir gozando de novas sesións de “As familias contan”.
Moitas grazas, Ádega!
13/05/26
O mercado de proximidade e o consumo responsable
O alumnado de 5º de Primaria está a traballar en Proxecto Competencial arredor do mercado de proximidade e do consumo responsable.
Ao longo destas sesións, os nenos e nenas investigan a procedencia dos alimentos que consumimos e reflexionan sobre a importancia de mercar produtos da nosa contorna para reducir a pegada ecolóxica, diminuír o transporte de mercancías e favorecer un consumo máis sostible.
O alumnado tamén está comparando o mercado de proximidade co supermercado, analizando as vantaxes ambientais, económicas e sociais do comercio local e elaborando materiais divulgativos, entre eles un tríptico informativo realizado polo propio alumnado.
Con esta proposta promóvese a educación ambiental, o consumo consciente e o coidado da contorna a través de situacións próximas e reais para o alumnado.
07/05/26
Desafío CanSat en 5º de primaria
Este curso académico, o alumnado de 5º participou no desafío CanSat. É unha iniciativa da Axencia Espacial Europea (ESA) que reta o alumnado de toda Europa a construír e lanzar un mini satélite do tamaño dunha lata de refresco.
Un CanSat é unha simulación dun satélite real, integrado dentro do volume e a forma dunha lata de refresco. O desafío para o alumnado é adaptar todos os subsistemas principais que se atopan nun satélite (xerador de enerxía, sensores e sistema de comunicación) dentro deste espazo tan reducido. Ademais, cómpre sempre deseñar un sistema de descenso en forma de paracaídas.
Na fase rexional en Galicia, o CanSat elévase dentro dun dron, dentro dun habitáculo específico xunto aos CanSats doutros equipos, sendo liberado en altitude para comezar a misión primaria. Na rápida caída realízase un experimento científico, analizando posteriormente os datos de presión e temperatura e humidade recompilados.
Aquí vos deixamos un video resumo de todo o traballo realizado.
Parabéns polo excelente traballo!
30/04/26
Xornada de convivencia no IES Paralaia
O pasado día 23 de abril, coincidindo co día do libro, realizamos unha saída moi especial coa nosa clase de 6º de Primaria ao IES de Paralaia. Foi unha xornada de convivencia na que puidemos coñecer de preto como é a vida no instituto, algo que nos fai moita ilusión porque o vindeiro curso daremos ese gran paso.
Nada máis chegar, recibíronnos con moita amabilidade e explicáronnos como ía ser a xornada. Despois, dividímonos en grupos para participar en diferentes obradoiros (francés, cibermentores e un abradoiro con cans, da protectora do Morrazo)
Sentímonos moi ben acollidos e aprendemos moitas cousas sobre como será a nosa próxima etapa. Foi unha experiencia moi interesante que nos axudou a perder os nervios e a ilusionarnos co cambio.
Ata setembro, IES Paralaia!
Celebrando "O Día do Libro" cos compañeiros de educación Infantil de "O Con"
O pasado 24 de abril celebramos o Día do Libro cunha fermosa actividade de convivencia entre 6º de Primaria e a escola de educación infantil "O Con".
Realizamos un apadriñamento lector, onde os maiores lles leron contos aos máis pequenos, compartindo historias e momentos moi especiais. Ademais, houbo un intercambio de cancións e e puxémoslle música coa guitarra de Txelu, a un conto que nos contou a todos e todas unha mestra de infantil que encheu a xornada de ledicia.
Foi unha experiencia moi enriquecedora que nos permitiu gozar da lectura xuntos e aprender uns dos outros. Volveremos pronto!
28/04/26
23 de abril. Día do Libro
Os padriños e madriñas lectores desfrutaron dunha lectura mutua, de contos teatralizados e de momentos moi especiais na biblioteca.
07/04/26
Última sesión de piscina
Aquí deixamos un resumo da última sesión de piscina.
Encantounos a experiencia!
27/03/26
Xogade. Intercentros
Onte, recibimos no cole ás nenas e nenos de Tirán, que viñeron compartir con nós unha xornada de convivencia na que practicamos xogos como o brilé, o hockey, atrapa a bandeira e tamén o datchball.
Moitas grazas pola vosa visita!
24/03/26
DÍA DA POESÍA
Onte, día 23 de marzo, celebramos no cole, xunto cos nosos afillados e afilladas lectores de 2º de primaria, o día da poesía. Intercambiamos, entre as dúas claases, flores e poemas. Os de segundo recitáronnos un poema moi bonito ao coro e nós, os de sexto, lémoslles poemas. Un poema e unha flor... hai algo mellor para comezar ou rematar o día?
Subscribirse a:
Publicacións (Atom)